ചിന്നപ്പനും പൊന്നപ്പനും

താമരക്കുളത്തിൽ ചിന്നപ്പൻ എന്നൊരു തവള താമസിച്ചിരുന്നു. ഒരു ദിവസം ചിന്നപ്പൻ കുളത്തിൻ്റെ കരയിലുള്ള ഒരു തെങ്ങിൻതോപ്പിൽ ചാടിച്ചാടി നടക്കുകയായിരുന്നു. പെട്ടെന്നാണ് ഒരുഗ്രൻ മഴ വന്നത്.

മഴ നനയാതിരിക്കാനായി ചിന്നപ്പൻ ഒരു വലിയ കൂണിൻ്റെ അടിയിലേക്കു കയറി നിന്നു. അപ്പോഴാണ് പൊന്നപ്പൻ തവള മഴ നനഞ്ഞു കൊണ്ട് അതിലേ വന്നത്. മഹാ അഹങ്കാരി ആയിരുന്നു പൊന്നപ്പൻ. ചിന്നപ്പനെ കണ്ടപ്പോൾ പൊന്നപ്പൻ ദേഷ്യത്തോടെ പറഞ്ഞു: "ഹും, ഈ കൂൺ എൻ്റെതാ, വേഗം ഇവിടെനിന്ന് പോയില്ലെങ്കിൽ നിൻ്റെ കഥ ഞാൻ കഴിക്കും!"

ഇതുകേട്ട് ചിന്നപ്പൻ പേടിച്ചുപോയി. അവൻ പറഞ്ഞു: ''ചങ്ങാതി എന്നെ ഉപദ്രവിക്കരുതേ! നമുക്കു രണ്ടുപേർക്കും മഴ നനയാതിരിക്കാനുള്ള സ്ഥലമുണ്ടല്ലോ ഇവിടെ!" "പറ്റില്ല, പറ്റില്ല" ഇങ്ങനെ പറഞ്ഞു കൊണ്ട് പൊന്നപ്പൻ ചിന്നപ്പനെ അവിടെനിന്ന് ഓടിച്ചു.

 പാവം ചിന്നപ്പൻ അവൻ ചാടിച്ചാടി കുറച്ചപ്പുറത്തുള്ള ഒരു മരത്തിൻ്റെ അടിയിലുള്ള പൊത്തിൽ കയറിയിരുന്നു. അപ്പോഴേക്കും മഴയുടെ ശക്തി കൂടി. ഒപ്പം ശക്തിയായ കാറ്റും വീശി. പെട്ടെന്ന് കൂൺ മറിഞ്ഞ് പൊന്നപ്പൻ്റെ ദേഹത്തു വീണു.... "ഹമ്മേ! " കൂണിനടിയിൽപ്പെട്ട് ചമ്മന്തിയായ പൊന്നപ്പൻ ഉറക്കെ കരഞ്ഞു.

ഒരുവിധത്തിൽ കൂണിനടിയിൽ നിന്നും പൊന്നപ്പൻ രക്ഷപ്പെട്ടു. മഴ നനഞ്ഞു കൊണ്ട് അവൻ എങ്ങോട്ടോ ചാടിച്ചാടി പോയി.

അങ്ങനെ പാവത്താനായ ചിന്നപ്പൻ തവളയെ ഉപദ്രവിച്ചതിന് പൊന്നപ്പന് ചേരുന്ന ശിക്ഷ തന്നെ കിട്ടി.

---

കുട്ടികൾക്ക് മലയാളത്തിലുള്ള കഥകൾ വായിക്കാൻ അവസരങ്ങൾ കുറഞ്ഞുവരുന്ന ഈ കാലത്ത് തികച്ചും സൗജന്യമായി ഒരു കഥാ ബ്ലോഗ് തയ്യാറാക്കിയിരിക്കുന്നു. ഓരോ ദിവസവും പുതിയ പുതിയ കഥകൾ ഈ ബ്ലോഗിൽ നിന്ന് നിങ്ങൾക്ക് വായിക്കാം. അമ്മമാരും മറ്റും അവരുടെ ചെറുപ്പകാലത്ത് വായിച്ചിരുന്ന പാഠപുസ്തകങ്ങളിലെ കഥകളും ബാലമാസികകളിലെ കഥകളും നിങ്ങൾക്കായി കൊച്ചുകൂട്ടുകാർക്കായി ഇവിടെ ലഭ്യമാക്കുന്നതായിരിക്കും.
ഈ സൈറ്റിനെക്കുറിച്ചുള്ള വിവരം നിങ്ങളുടെ കൂട്ടുകാരുമായും മറ്റും പങ്കിടൂ..
നിങ്ങളുടെ കൈയിൽ കുഞ്ഞിക്കഥകൾ ഉണ്ടെങ്കിൽ അയച്ചുതരിക..യോഗ്യമാണെന്ന് തോന്നുന്ന പക്ഷം രചയിതാവിന്റെ പേരടക്കം ഈ ബ്ലോഗിൽ ആ കഥ പ്രസിദ്ധീകരിക്കാം.. Send Your Stories to mashhari30@gmail.com