അനന്തുവിൻ്റെ വീട്ടുമുറ്റത്തെ പനിനീർച്ചെടികൽ ആദ്യമായി പൂവ് വിരിഞ്ഞിരിക്കുകയാണ്. അവൻ ആഹ്ലാദത്തോടെ ചെടിക്കരികിലേക്ക് ഓടിച്ചെന്നു. പാതിവിടർന്ന പനിനീർപ്പൂവിൻ്റെ ചന്തം നോക്കി നിന്ന അവൻ, ഒരു പൂമ്പാറ്റകൂടി വന്നിരുന്നെങ്കിൽ എന്ന് ആശിച്ചു പോയി. പൊടുന്നനെയാണ് അവൻ അത് കണ്ടത്.
പനിനീർച്ചെടിയുടെ കുരുന്നിലകൾ കാർന്നു കാർന്നു തിന്നുകയാണ് ഒരു പച്ചപ്പുഴു! അനന്തുവിന് വല്ലാത്ത അരിശം വന്നു. അവൻ ഒരു വടിയുമായി അതിൻ്റെ അടുത്തേക്ക് ചെന്നു.
" പച്ചിലയിങ്ങനെ തിന്നു മുടിക്കും
പച്ചപ്പുഴുവേ ചെറുപുഴുവേ
പള്ള നിറച്ചതു മതിയാക്കൂ നീ
ചുള്ളിക്കമ്പാൽ തല്ലീടും!"
അത്രയും പറഞ്ഞ് അവൻ പുഴുവിനെ അടിച്ചു വീഴ്ത്താൻ ചെന്നു. അതുകണ്ട് മുറ്റമടിച്ചുകൊണ്ടിരുന്ന അമ്മ അവനെ തടഞ്ഞു.
''തല്ലരുതയ്യോ കഥയറിയൂ
നാളെയിതല്ലോ പൂമ്പാറ്റ
ഇന്നിതു പച്ചില തിന്നോട്ടെ
കൊന്നീടല്ലേ പൊന്നുണ്ണീ! "
അമ്മ അവനെ പൂമ്പാറ്റയുടെ കഥ പറഞ്ഞു കേൾപ്പിച്ചു. അപ്പോൾ അറപ്പ് തോന്നുന്ന പുഴുവാണ് നാളെ ആരും ഇഷ്ടപ്പെടുന്ന പൂമ്പാറ്റയെന്ന അറിവ് അവനെ അത്ഭുതപ്പെടുത്തി.
അവൻ കൗതുകത്തോടെ നാളത്തെ പൂമ്പാറ്റയായ പച്ചിലപ്പുഴുവിനെ നോക്കിനിന്നു. കാര്യമറിയാതെ പുഴുവിനെ കൊല്ലാൻ ശ്രമിച്ചതോർത്ത് അവന് കുറ്റബോധം തോന്നി. അതു മനസ്സിലാക്കിയ അമ്മ അവനെ ആശ്വസിപ്പിച്ചു.
കൂട്ടുകാരെ നമുക്കുചുറ്റും ഇതുപോലുള്ള ഒട്ടേറെ വിസ്മയങ്ങൾ ഒളിച്ചിരിപ്പുണ്ട്. കാര്യമറിയാതെ നാം ആരെയും ചെറുതായി കാണരുത്.
ഈ സൈറ്റിനെക്കുറിച്ചുള്ള വിവരം നിങ്ങളുടെ കൂട്ടുകാരുമായും മറ്റും പങ്കിടൂ..
നിങ്ങളുടെ കൈയിൽ കുഞ്ഞിക്കഥകൾ ഉണ്ടെങ്കിൽ അയച്ചുതരിക..യോഗ്യമാണെന്ന് തോന്നുന്ന പക്ഷം രചയിതാവിന്റെ പേരടക്കം ഈ ബ്ലോഗിൽ ആ കഥ പ്രസിദ്ധീകരിക്കാം.. Send Your Stories to mashhari30@gmail.com
